Սիրելի՛ բարեպաշտ ժողովուրդ,
Տարեմուտի սեմին Մայր Աթոռ Սուրբ Էջմիածնից աղօթքով եւ Ողորմած Աստծոյ շնորհների հայցով Հայրական Մեր սէրը եւ օրհնութիւնն ենք բերում ձեզ ի Հայաստան, Արցախ եւ ի սփիւռս:
Յոյսով ու բարի ակնկալիքներով դիմաւորում ենք 2017 թուականը` հրաժեշտ տալով մեր ժողովրդի համար յուզումներով դժուարին տարուայ: Մէկ անգամ եւս ապրեցինք պատերազմի, ռազմական սադրիչ գործողութիւնների տագնապները եւ կորուստների ցաւը, նաեւ` ամսավերջի այս օրերին: Ականատես եղանք եւ սխրանքներին մեր զաւակների, որ անառիկ պահպանեցին մեր երկրի սահմանները: Զգացինք քաջալերութիւնը հայրենիքը պաշտպանելու պատրաստ մեր ժողովրդի միասնականութեան: Անցնող տարում յաղթահարեցինք նաեւ ներքին անկայունութեան սպառնալիքը` հաստատելով օրինականութեամբ խնդիրները վճռելու մեր ուղին:
Այս մարտահրաւէրներով ու հայրենական մեր կեանքի բոլոր դժուարութիւններով հանդերձ` մեր ժողովուրդը Աստծոյ օրհնութեամբ արարեց, բարիք ստեղծեց, ի սփիւռս աշխարհի տօնեց անկախ մեր պետականութեան 25-րդ տարեդարձը, զօրավիգ կանգնեց ու սատարեց պատերազմական նեղութիւնները կրող սիրիահայութեանը: Հայրենիքում եւ սփիւռքում մեր ժողովուրդն ապրեց առ հայրենին սիրով, յոյսով լաւատես, որ նորոգեալ կեանքով, իր աշխատանքով, տաղանդով ու ձեռքբերումներով կերտելու է իր բարօր, լուսաւոր ներկան ու ապագան: Գոհութիւն ենք յայտնում Երկնաւորին, որ մեր ժողովրդի զաւակները կարեւորեցին իրենց հոգեւոր աճը, զօրացրեցին իրենց հաւատքն ու քրիստոնէական ճանաչողութիւնը, որին ուղղուած է մեր եկեղեցու ընդարձակուող գործունէութիւնը: Քրիստոնէական մեր հաւատքի լիուլի դրսեւորումը այն ժայռեղէն հիմքն է, որի վրայ շարունակ պիտի բարձրանայ մեր կեանքը եւ ունենայ ներուժը` յաղթանակներ կերտելու:
Տարեմուտը հրաւէր է նորոգութեան, վերափոխուելու, հրաժարուելու անցեալի սխալներից ու բացթողումներից: Մեր յորդորն է, սիրելի՛ բարեպաշտ ժողովուրդ, որ քրիստոնէական սիրով, հայրենաշԷն ջանքերով, մեր երկրում կայունութեան պահպանման եւ օրինականութեան ամրապնդման նախանձախնդրութեամբ մասնակցութիւն բերենք մեր պետական ու հասարակական կեանքի զօրացմանը եւ ի սփիւռս աշխարհի մեր ազգային եւ եկեղեցական անդաստանի շէնացմանը: Ծառայենք միմեանց, ծառայենք մեր հայրենիքին, որի օրհնեալ կեանքը պիտի կերտենք, ծառայենք մեր ազգին, որ բազում յոյսեր ունի իրագործելու: Օգնական լինենք նեղեալներին եւ կարօտեալներին: Միմեանց հանդէպ սէրը, բարի նպատակն ու գործը Աստուած անտես չի անում: Յանձնառութեան այս ոգով դիմաւորենք 2017 թուականը:
Համայն հայոց հոգեւոր նուիրական կենտրոն Սուրբ Էջմիածնից Մեր աղօթքն ենք բարձրացնում, որ Աստուած օրհնի մեր հայրենիքը, օրհնի մեր ժողովրդի կեանքը ի սփիւռս աշխարհի, անվտանգ ու անյաղթ պահպանի մեր բանակի զինուորներին ու սպաներին, օրհնի յիշատակը հայրենիքի համար զոհուած Մեր քաջարի զաւակների եւ ամուր ու անխաթար պահի խաղաղութիւնը մեր երկրի սահմաններին: Խաղաղութիւն ենք մաղթում ողջ աշխարհին, խաղաղութիւն` Մերձաւոր Արեւելքին, Սիրիային, Իրաքին: Թող մեր Փրկչի առատ շնորհները, ուրախութիւն, երջանկութիւն, բիւր բարիքներ հեղուեն ձեր կեանքից եւ ձեր ընտանիքներից ներս, սիրելիներ: Պահպանէք ձեր հաւատքը, պահպանէք ձեր հայրենասէր, ազգանուէր ոգին, հոգ տարէք միմեանց, հոգացէք յաւիտենական կեանքի համար, որ ունենք Յիսուս Քրիստոսով: Մաղթում ենք բարի, օրհնեալ տարի բոլորիդ: Շնորհաւոր Նոր տարի:
Ամենայն Հայոց Գարեգին Բ. Կաթողիկոս