Երկրում ընթացող վերջին իրադարձութիւնների կապակցութեամբ յայտնում ենք, որ օրինականութեան հաստատման, օրէնքի առջեւ բոլորի հաւասարութեան, անպատժելիութեան մթնոլորտի վերացման ուղղութեամբ ձեռնարկուող քայլերը ողջունելի են:
Խիստ կարեւոր է, որ բոլոր գործընթացները տեղի ունենան իրաւական հարթութեան վրայ` օրէնքի տառին ու ոգուն համապատասխան եւ որեւէ հիմք չտան տարատեսակ մեկնաբանութիւնների եւ քաղաքական շահարկումների համար:
Երկրի առջեւ ծառացած ներքին ու արտաքին բազմաթիւ մարտահրաւէրները արդիւնաւէտ յաղթահարելու կարեւորագոյն գրաւականն ամուր պետութիւնն է, ազգային միասնականութիւնը եւ ներհասարակական համերաշխութիւնը:
Արցախի եւ Հայաստանի շուրջ առկայ ռազմաքաղաքական լարուածութիւնը թելադրում են պետական բոլոր հաստատութիւնների եւ, առաջին հերթին, հայոց բանակի հանդէպ հաւատը խաթարող որեւէ դրսեւորման բացառում:
Համոզուած ենք, որ իշխանութիւնները պէտք է իրականացնեն ժողովրդին համախմբողի գործառոյթ եւ որեւէ հարցի հետապնդման ձեւ պէտք չէ վտանգի այդ համախմբուածութիւնը:
Այս համաթեքսթում ենք դիտարկում նաեւ 2008 թուականի մարտի 1-ի եւ նորանկախ պետականութեան նախընթաց ժամանակահատուածի այլ ողբերգական իրադարձութիւնների առարկայական, անաչառ ու համակողմանի քննութիւնը:
Այս առումով մարտի 1-ի դէպքերի կապակցութեամբ Հայաստանի Հանրապետութեան երկրորդ նախագահ Ռոպերթ Քոչարեանին եւ օրուայ իշխանութիւնների այլ ներկայացուցիչների` սահմանադրական կարգը տապալելու մեղադրանք ներկայացնելը խիստ մտահոգիչ է եւ կարող է մեկնաբանուել որպէս քաղաքական հալածանք:
Հ.Յ.Դ. ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
27 յուլիս 2018
Երեւան